دايما .. وبكل لحظة ... و بكل دقيقة ..
نسترجع بذاكرتي لشهرين ورا ...
نتذكر اليوم اللي اتصلوا علينا ... و بلغونا :
"مبروك ..! وافقوا عليكم عشان تتبنون طفل من الدار ! "
أول شي يطري على الكل ! ا ان احنا فيننا شي !
أو ان احنا متسرعين !!
او ليش اخذنا هالقرار و احنا بهالعمر الصغير ؟؟!
على الرغم من ان احنا طبيعين و مافيننا اي شي يعيق الانجاب ؟؟
و ليش و ليش و ليش ....؟؟؟؟
ردي بكل بساطة ....
" أهما بشر" ...!
اي نعم ... لكل طفل الحق أنه يعيش حياته في بيئة صحية فيها كل الحب و الحنان اللي يبيه ...
سموهم مثل ما تبون :
لقيط , يتيم, طفل خطيئة , غلطة. ابن زنا !!
لكن تذكروا انهم بالنهاية : أطفال !!
ما اختار اهوا حياته
ولا انتوا اخترتوا حياتكم!
تخيلوا ولو لحظة !
لو كنت انته مكانهم ؟!
اي صح بتقولون : احنا يا الله ملحقين على عيالنا !!
و احنا و احنا...
لكن العمر بيمشي ....
و بالنهاية شنو البصمة اللي سويناها بالدنيا ؟؟؟؟!
الدافع اللي خلانا نتبنى طفل ان يوم قعدنا نبحث بالموضوع لمدة سنتين تقريبا ..شفنا ان هالفكرة موجودة عند الغرب حيل ..
و نسينا إن ديننا اهو دين الإنسانية . اللي للأسف تبدلت و تشوهت صورته هالايام و صار بسبب غفلة الجميع : دين العدوانية
لكن ... احنا محظوظين ...
و الله سبحانه و تعالى اختارنا ...
و هالشي اللي مخلينا نفتخر في هذه الحياة ...
نعمة من الله انه يزرع في قلوبنا بذرة الخير
و نعمة من الله ان يخلينا ناخذ طفل مجهول الهوية ..ضعيف .. لا ذنب له .. و نغير حياته ...
و نعمة من الله أنه زاد حبه في قلوبنا و قلوب اللي شافوه كلهم ...
أنت يا محمد ...يا ولدنا الغالي ...
أكبر نعمة من الله ...
بتكون دايما أول فرحة دخلت قلوبنا ..
و بجرنا و طفلنا الاول ..
و الحين احنا اللي نقولك شكرا ...
لانك انت اخترتنا ...
وابتسمت لنا من بد الأطفال ...
شكرا لك يا محمد ...لأن خليتنا
أم حمودي و أبو حمودي
نحبك ...
من
ماما و بابا
أولا اهنيكم و ابارك لكم علي حمودي الله يبلغكم فيه يارب و يكون ولد صالح بار لكم
ردحذفسؤال اتمنى الاجابه عليه بصراحه .. لو كان عندكم اطفال من اصلابكم هل كنتو راح تتبنون الطفل؟ او تطبقون الفكره؟
راح تييبون طفل غريب بين اطفالكم خاصه مع سالفه المحارم و غيرها؟
هل راح يتولد عندكم الاحساس و الحلم بالتبني لو كان عندكم اطفال ؟
مبروك عليكم هذا الولد، ومبروك عليه هالأم والأب اللي حنوا عليه أكثر من والدته... يعطيكم ألف عافيه والله يكثر من أمثالكم، نادراً نشوف ناس تبادر بأمور إنسانيه بدون الرضوخ للضغوط الإجتماعيه السخيفه... الله يهنيكم في بعظ!
ردحذفأبشروا بالخير فقد قال قال النبي -صلى الله عليه وسلم-: (وَأَنَا وَكَافِلُ الْيَتِيمِ فِي الْجَنَّةِ هَكَذَا) وَأَشَارَ بِالسَّبَّابَةِ وَالْوُسْطَى وَفَرَّجَ بَيْنَهُمَا شَيْئًا (رواه البخاري).
ردحذفمشالله مشالله و تبارك الرحمن على حمودي و الله العظيم و انا قاعده اقره عيوني تغورق غصباعلي فعلا عمل انساني و نادر انشوفه عندنا مع هالضغوطات الاجتماعيه!!
ردحذفو عسالله يحفظ لكم حمودي و يطرح فيه البركه و انشوف حق حمودي اخت او اخو منكم اللهم اميييين
such a wonderful people
ردحذفalaah ekhaly 7amoody for you both ^_^
ماشاء الله ربي يبارك لكم فيه ,, ويجزاكم كل الخير ان شاء الله
ردحذفويجعله ابن صالح وبارك لكم ويهنيكم فيه طول العمر
السلام عليكم
ردحذفطيب ولي كبر حمودي انتي مسلمة واهو مو محرم لج والا عادي تقطين الحجاب جدامه ؟!!
موفقة خير
السلام عليكم ورحمة الله
ردحذفالله يبارك لكم ويعطيكم على نيتكم ..
ممكن اعرف شلون اتواصل معاكم بموضوع خاص لو سمحتو ؟
خلي اخواتك وأخوات زوجك يرضعون حمودي حتى يصير محرم لك ولخوات زوجك
ردحذفللتوضيح محمد رضعته مرت اخوي ليكون محرم علي
ردحذف