مساء الخير جميعا :)
أول شي احب أشكر كل الأشخاص اللي انضموا الى مدونتنا و على تعليقاتهم الرائعة اللي بصراحة تسعدني حيل حيل
أمس كانت تجربة يديدة لأول مرة تمر علينا انا و بو حمود :)
كان أول موعد لدكتور أطفال حق حمودي
بعد استشارات كثيرة من الأهل و الاصدقاء وقع الأختيار على الدكتور الرائع و استشاري الأطفال
د.ياسر القحف في مستشفى السيف
موعدنا كان الساعة 6.15 بس ماشاءالله كانت العيادة زحمة حيل فما دخلنا الا بعد ساعة و نص :)
وهذا حمودي قاعد ينطر دوره :)
و بعد ماجانا الفرج دخلنا حمودي لغرفة الفحص الاولي ، و قاسوا طوله ووزنه :)
و خذوا قياسات محيط الرأس
اضطرينا ننطر بعدها مدة فنزلنا ستاربكس و احنا صاعدين فوق و الا بالصدفة لقيت جدامي الإنسانة اللي كان لها دور كبير في مسااعدتي و اهيا اللي رشحتلي حمودي يوم كنا بالدار ..
اهيا الاخصائية النفسية "أم سليمان " الغالية
تخيلوا أن حمودي اول ماشافها قعد يطالع ويهها و قط نفسه عليها و قعد يلمها سبحان الله
حتى الطفل عمره ما ينسى وجوه حنت عليه و عطفت عليه
ما اقولج يا أم سليمان إلا عسى الله ياجرج على عملج الرائع و كانت أحلى صدفة شفناج فيها
نرجع إلى موعدنا ! طبعا أول مانادونا دخلنا غرفة الدكتور ياسر و كانت بصراحة غرفة جاذبة للأطفال حمودي حده اسنانس و قعد يلعب بالالعاب اللي هناك .. :)
أول ما دخل علينا الدكتور قلناله عن وضع حمودي و ان احنا حابين نتطن عليه لأنه ما نعرف أي شي عن تاريخ عايلته الطبي
كانت أول ردة فعل للدكتور ياسر قال :
"أنا بقولكم شي واحد !!! (أنا و كافل اليتيم في الجنة كهاتين) ! بس هذا اللي بقدر أقوله!"
ردة فعله رسمت الإبتسانة علي و على بو حمود :) ماقدرت أنساها
عجبتني طريقة تعامل د.ياسر مع حمودي شلون كان يلاعبه و يكلمه وهالشي أكثر شي شدني يوم استفسرت عنه ، لي درجة إن حمودي كان مستانس و يضحك معاه :)
و الحمدلله بعد ما فحص حمودي لله الحمد طمنا عليه و قالنه كل شي سليم لله الحمد و المنة
و كانت بصراحة تجربة حلوة أول مرة نخوضها و تطمنا على حمودي الغالي :)
أسعدتونا عسى ربي يسعدكم ويبارك لكم :)
ردحذف